Ծառերն են բացվել, բողբոջել նորից
«Սիրո ճանապարհ» ժողովածու · 1954
Ծառերն են բացվել, բողբոջել նորից,
Մայիսն է կրկին իջել ձեր այգում.
Բուրմունք է ելնում տամուկ հողերից,
Ծանոթ խայտանքով սիրտս վարակում։
Գանգուր բաղեղն է աճել վերստին,
Փարվել չափարին ծաղկած ձեր այգու,
Կարոտդ է այդպես փարվել իմ սրտին,
Գաղտնիքդ սակայն… լեզուս է փակում։
Գարո՜ւն։ Աշխարհում նորից հիմա նա
Ինչ ունի՝ փռե՜լ, բացել է ինքը։
Ինչ լա՜վ է գարնան գաղտնիքն իմանալ,
Երբ թաքուն է մեր… սիրո գաղտնիքը։
Երևան Նավչալու · 22.V.1946թ. 21.VII.1953թ.
